Расман: Кураш 2022 йилги Осиё ўйинлари дастуридан ўрин олди

Ўзбек халқининг миллий спорти бўлмиш кураш 2022 йил Хитойнинг Хангжоу шаҳрида бўладиган XIX ёзги Осиё ўйинларининг мусобақалар дастурига киритилди. Бу ҳақда ЎзА хабар бермоқда.

Бу 2-3 март кунлари Таиланд пойтахти Бангкок шаҳрида ўтказилган Осиё Олимпия кенгашининг навбатдаги Бош ассамблеясида расман тасдиқланди.

Унга кўра Хангжоуда 40 та спорт тури бўйича мусобақалар расман ўтказилади. Жакарта-2018даги Осиё ўйинлари дастуридан 42та спорт тури ўрин олганди. Қолаверса, Индонезиядаги мусобақада иштирокчилар сони ҳам 11 720 нафарни ташкил этган бўлса, Хитойга бу борадаги кўрсаткич 10 000 нафарга камайиши айтиб ўтилди.

2010 йилги Гуанчжоу ҳамда 2014 йилги Инчеонда ўтказилган Осиё ўйинларида расман мусобақалар дастурига киритилган крикет Индонезиядаги мусобақалар дастуридан четлатилган эди. Аммо, 2022 йилги Осиё ўйинлари дастурига крикет қайтарилди.

Ноолимпия спорт турлари орасида шахмат, жиу-житсу, каббади, кураш, сепак такрав, роликда учиш ва у-шу ҳам Хангжоу-2022нинг расмий мусобақалари дастурига киритилди.