АҚШнинг қарзлари
тарихда илк бор энг юқори – 22 триллион долларлик миқдорни қайд этди. Мамлакат
қарзлари Дональд Трампнинг солиқ ислоҳотлари ва мудофаа учун қилинган
харажатлари боис ана шу кўрсаткичга етди. Бу ҳақда АҚШ Молия вазирлиги хабар
бермоқда.
Рақамларга аниқлик
киритиладиган бўлса, қарзнинг аниқ қиймати 22,012 триллион долларни ташкил
этади. Вазирлик маълумотларига кўра, 2019 йилнинг февраль ойи бошидан кўрсаткич
90 миллиард долларга кўтарилган.
Умумий олиб
қаралганда, АҚШ қарзлари сўнгги 11 ой ичида бир триллион долларга кўпайган.
Дональд Трамп АҚШ президенти бўлганидан сўнг, давлат
қарзлари юқори суръатларда оша бошлади. 2018 молиявий йилда АҚШ бюджетидаги камомад
17 фоизга ошиб, 779 миллиард долларга етганди. 2020 йилга бориб ушбу миқдор
тирилион долларлик кўрсаткичга етиши айтилмоқда.
Бундай
ўсишлар ўтган йили АҚШ бюджетига 1,5 триллион долларга тушган солиқ
ислоҳотлари, шунингдек, мудофаа учун сарфланган харажатлар билан изоҳланмоқда.
Маълумот ўрнида, АҚШ президенти Дональд Трамп ўзининг
солиқ ислоҳотини «тарихий
ғалаба»
деб, сенатор-демократ Элизабет
Уоррен эса буни «ўғрилик» деб атаган эди.
Трампнинг солиқ ислоҳотининг моҳияти
шундан иборатки, у солиқ тўловчиларнинг турфа хиллигига қараб, солиқ тўлашни
енгиллаштиришга эътибор қаратади. Шу мазмундаги қонун 2017 йилда имзоланган
эди.
Шу боис, биринчи навбатда, солиқлар тадбиркорлар учун
пасайтирилди. Айнан олиб қаралганда, ислоҳотлар юридик шахслар даромадидан
олинадиган солиқнинг 35 фоиздан 21 фоизга тушишини назарда тутди. Шунингдек,
хорижий юридик шахсларнинг мамлакатга олиб кирадиган воситаларига солинадиган
солиқ ҳам пасайтирилди – 15,5 фоизгача нақд воситалар учун, 8 фоизгача (35 фоиз
ўрнига) нақд бўлмаган воситалар учун.
Трампнинг солиқ ислоҳотларига қарши чиқаётганларнинг
фикрича, соғлиқни сақлаш ва ижтимоий дастурларга ҳомийлик қилувчи республикачилар
қисқартиришни истаётган солиқлардан бой америкаликлар кўпроқ манфаатдор
бўлишади.
«Сўнгги икки йил
ичида биз АҚШ Қуролли кучларини тўлиқ кучайтиришни бошладик», — деди 6 февраль куни сенат ва АҚШ конгресси вакиллар
палатасига мурожаат қилар экан Вашингтон маъмурияти бошлиғи. Унинг
таъкидлашича, ўтган йили Петагон бюджети тахминан 700 миллиард долларни ташкил
этган, бу йил бу рақамлар 716 миллиард долларга етиши мўлжалланмоқда.
Трамп ўтган йилнинг ноябрь ойида АҚШ давлат қарзлари
унинг иккинчи президентлик даври сўнгига қадар тўлиқ сўндирилишини ваъда
берганди. Иш ўринларини кенгайтиришга бағишланган тадбирда у яқин кунларда
давлат қарзларини узишни бошлашини маълум қилганди, деб ёзмоқда The Hill нашри.
Трампнинг айтишича, АҚШ қарзлари демократлар
партиясидан президент бўлган Барак Обама вақтида ошиб кетган.
АҚШ Молия вазирлиги
статистикасига кўра, АҚШ қарздорлиги бўйича етакчи мамлакатга 1,121 триллион
доллар инветиция киритган Хитой бўлиб турибди. Ундан сўнг эса Япония (1,036
трлн), учинчи ўринда эса Бразилия (311,4 млрд) бормоқда.
Сарвар Анвар ўғли тайёрлади
Комментарии
Отправить комментарий