Америкалик қотил 90 нафар хотин-қизни ўлдирганини тан олди

Умрбод қамоқ жазосига тайинланган АҚШлик қотил Сэмюэл Литтл ўн йиллар давомида 90 марта қотиллик қилганини тан олди. У ҳар бир қурбонининг суратини чизган ва ФБР ана шу суратлар орқали ўлдирилганларнинг шахсини аниқламоқда. Агар 78 яшар Литтлнинг кўрсатмалари тўғри чиқса, унда у АҚШ тарихида энг кўп одам ўлдирган қотил сифатида қайд этилади.

Сэмюэл Литтл уч кишининг умрига зомин бўлгани учун унга умрбод қамоқ жазоси берилган. У 2012 йил гиёҳванд моддаларни сотишда айбланиб Кентукки штатида қўлга олинган. Унинг ДНК таҳлиллари Сэмюэл Литтл ўтган асрнинг 80-йилларида содир этилган, уч нафар инсоннинг қотиллигида алоқадорлигини кўрсатди. У судда айбига иқрор бўлмади, бироқ аниқ далиллар унга умрбод қамоқ жазоси тайинланишига етарли бўлди.

ФБР ходимлари Литтлга жазо тайинланганидан сўнг, очилмаган қотиллик ишларида унинг алоқаси бор-йўқлигини тешира бошлади. Олиб борилган суриштирув ишлари натижасида Литтл 70-йилларда қилинган қотилликларга алоқаси борлиги маълум бўлди. У ФБР ходимлари билан ҳамкорлик қилишга рози бўлди, фақат қамоқхонани ўзгартириш шарти билан.  

Литтл 2018 йилнинг ноябрь ойида Флорида штати ва Колумбия округидан Калифорниягача бўлган ҳудудда 90 та қотиллик қилганини бўйнига олди. Унинг қурбонлари фоҳишалар ва гиёҳванд хотин-қизлар бўлган ва шунинг учун уларнинг суриштирув ишларига унчалик аҳамият берилмаган. Аксари қотилликлар бахтсиз тасодиф кўринишида ёки гиёҳванд моддаларни меъёрдан ортиқ қабул қилиш оқибатида ҳалок бўлиш тарзида амалга оширилган. Шу боис Литтл қурол ишлатмаган, у қурбонларини бўғиб ўлдирган.

Литтл жиноят жойи ва ўша пайтда ҳайдаган машина маркалари ҳақида аниқ маълумот берди. Аммо қотил қотиллик амалга оширлган саналарни айтиб бера олмади, шу боис қурбонларни полиция базасидан қидириш ишлари оғир кечди. Бугунга келиб ФБР Лттл билан алоқадор 34 та қотиллик ишини очишга муваффақ бўлди. 1994 йилда қилинган қотиллиги учун Техас суди томонидан умрбод қамоқ жазоси олди.

Жорий йилнинг 13 февраль куни ФБР Литтл хотирлаб чизган суратларга қараб 16 нафар қурбоннинг шахсини аниқлашга муваффақ бўлди.